ECM Moderator New Delhi MCF a vaih

New Delhi: Pachawh 18,2010
ECM nata MEC tawhta pachhuahpanohpa Rev.S.T. Zawsi (Moderator of Mara Evangelical Church of Maraland) cha New Delhi liata a ypa Mara sawzy (Mara Christian Fellowship, New Delhi) vai awpa ta Pachawh 16, 2010 liana kha ta New Delhi MCF sahlaozy nata aly kawpa hmia ama hmô haw. A zasie laihna liata a za chapiapa Kolkata MCF, Chennai MCF nata Bangalore MCF zy lia chhao thlahchhâna nata ahmo pakhyna a hneipâ laih hra.

(MCF Utheizy nata ECM Moderator he hawhta atheithlahna nothlah ama la.)

MCF New Delhi ta thlahpa lâta ama nodi dâhphina cha MEC ryureina laichaipa Assembly, Satu Ngephe lâta ahawna tao ta, MEC ta ano râhchhoh a châ leinazie nata ECM ta vaih thei sala arainao viana dâh vaw pahno thai kaw ta MCF ahawna ao cha ECM Office pahnie ta, ECM ta hmah tlai alapa a châ.

Châ reihtuhpazy nama lalao lei nawpa ta Delhi lia he MCFsâno y ta, atahma ta aza vaipa he MCF New Delhi a châ. A zavai chhâ chaina cha MCF New Delhi liata Mara sawzy Bâti, Thisaih nata Sawhlanazy hneipa awpa ta a zupa châta, châhrasala ano aza tlô hlata liata MCF sahlaozy ta ama thlahpa lâta nopaw awpa ama byuh kawpa vâta Pastor atly hawpa châta ECM Moderator ta MCF sahlao zydua ta ama khokheipa Puhpa Lechotha cha Pro.Pastor pa i-na chhao ahneipâ hra. Atahma ta Pro. Pastor eima pa i-pa he Thisaih raina nata sawhla deileipa cha biehnei pie khaipa chata MCF chhao he anota(Independently) ta aduahpa a châ vâta ECM or MEC ahy Pastor chhao rai cha tly aw pi ta, thisaih chhao eima cha za rai tyh aw tahpa ta a reih hra. MCF New Delhi he July 12, 2009 liata paduapa châta atahma ta EMC Moderator he MCF zy ta Marapa Pastor hmia ama hmô tuachaipa a châ. Bâti châna, Thisaih dona nata Sawhlana zy chhao eikhana a châ hra. ECM Moderator pohpa cheingei ta sawchapaw 2 nata sawchano 2 Khazohpa lâta hlana hnei ta, Bâti 3, kupatusana baokha nata Pro-Pastor pa i-na chhao pakhyna service liata a hnei. MCF member he 100 chô châ ei ta, atamy ta apakhyna o a tlô theipa cha 70 chô lâ ama châ. North lâta a ypa Marasaw chhaikha chhao ama vaw hlao theipa ta pahnopa a châ.

(He hawhta Sawhlana hneipa a cha.)

(He hawhta Bati pachasana chhao ahnei hra.)

(Puh Lechotha hnohta Pro-Pastor pa i-na a hnei.)

(He hawhta Khazohpa bie a chakheina a hnei.)

ECM Moderator ta a reipa cha, “Na mo MCF he KTP nata KNP zy hnei khai haw ei chita Fellowship a tah awpa châ khao leipa ei chita Local nama tloh haw, chavâta May thla liata ECM nata MEC Join meeting lia he Local kaw hia ula Mara Church ama tah awpa apha” tahpa thâ patlona bie a reih. Sermon a hnei nota alytu haw ta âlyna palâsa nawpa ta ano Moderator a châ tuachai nota Hlabu pha kawpa (Amâ ruchaipa) chhao MCF lâta a pie haw.

(MCF liata eikhana Thisaih dona cha he hawhta pachhuahpanohpa a cha.)

(MCF Secretary(Left) nata Chairman(Right) zy ta Bati, Sawhlapa nata Ku apatupazy moh ama pie ngala nopa a cha.)

(Daihti chha tawhta zawpi ta hmaokha ta niedo khohna hneipa chata he he MCF Utheizy nata Moderator apaha kawpa ta ama nie ngala nopa a cha.)

MCF New Delhi he May thla thaona liata ama luh thiehpazy atlyna(Election) ama hnei heih bâ aw tahpa ta pahnopa a châ.

Pachawh 19,2010 Hriatuanoh liata a yna su la a pangai pakhau aw.

Ei cha ly kaw ei,